فوائد ومسائل:
(۱)کوئی بیماری از خود متعدی نہیں ورنہ پہلے کو بیماری کس نے لگائی ہے۔ جراثیم کا منتقل ہونا اللہ تعالیٰ کے حکم پر موقوف ہے، از خود ان میں یہ تأثیر نہیں۔ بسا اوقات ساتھ رہنے والا محفوظ رہتا ہے اور دور والا متأثر ہو جاتا ہے۔ تاہم وہم سے بچنے کے لیے ایسے مریضوں سے دور رہنے کا حکم ہے تاکہ عقیدہ خراب نہ ہو۔
(۲) بری چیز یا برا کلمہ سن کر دل میں وہم پیدا ہونا فطری بات ہے، تاہم اس وجہ سے اپنے کام سے رکنا مسلمان کے لیے ناجائز ہے۔ البتہ اچھا کلمہ سن کر نیک شگون لینا پسندیدہ امر ہے بشرطیکہ وہ سفر یا کام جائز اور مباح ہو۔ اگر سفر نافرمانی کا ہے یا کام حرام ہے تو وہ اچھا کلمہ شیطان کی طرف سے ہوگا۔

فوائد ومسائل:
(۱)الو کے بارے میں اہل علم کے مختلف اقوال ہیں جن میں سے دو زیادہ مشہور ہیں:زمانہ جاہلیت میں لوگ یہ خیال کرتے تھے کہ جب کسی مقتول کا بدلہ نہ لیا جائے تو اس کے سر سے ایک الو نکلتا ہے جو اس کی قبر کے ارد گرد چکر لگاتا ہے اور کہتا ہے مجھے (بدلے کا خون)پلاؤ، مجھے پلاؤ۔ جب تک اس کا بدلا نہ لیا جائے وہ واپس نہیں جاتا۔ دوسرا قول یہ ہے کہ اس کی روح یا ہڈیاں الو کی شکل اختیار کر لیتی ہیں اور سات دن تک یہ پکارتی رہتی ہیں اور بعدازاں واپس چلی جاتی ہیں۔ اسلام نے اس کی تردید فرمائی اور واضح کیا کہ اس کی کوئی حقیقت نہیں۔
(۲) بدشگونی اور فال کی تفصیل گزشتہ حدیث میں گزر چکی ہے اور جہاں تک نظر لگ جانے کا تعلق ہے تو یہ برحق امر ہے۔ یہ کبھی حسد کی وجہ سے ہوتی ہے اور کبھی کسی چیز کے اچھا لگنے سے بھی ہو جاتی ہے۔ اس لیے شریعت نے کسی چیز کے اچھا لگنے پر ماشاء اللہ پڑھنے کا حکم دیا ہے۔ ایک حدیث میں تو یہاں تک ہے کہ آپ نے فرمایا:میری امت کی اکثر اموات اللہ کی تقدیر کے بعد نظر لگنے سے ہوں گی۔ (حسن، مسند ابي داود طیالسي:۱۷۶۰، السنة ابن ابي عاصم:۳۱۱، مجمع الزوائد:۵؍ ۱۰۶)۔ اس لیے اس سے بچاؤ کے لیے مسنون اذکار اور آخری تینوں قل پڑھنے اور ان کا دم کرنے کا اہتمام کرنا چاہیے۔