فوائد ومسائل:
(۱)طیبی رحمہ اللہ نے فرمایا ہے کہ فقر کے لغوی معنی توڑنے کے ہیں اور یہ فقار الظہر سے ماخوذ ہے۔ اصطلاحی طور پر یہ چار معانی میں مستعمل ہے۔
٭ حاجات ضروریہ کا وجود، یہ صورت تمام لوگوں کو اس وقت تک شامل ہے جب تک وہ اس دارفانی میں ہیں۔ جیسا کہ ارشاد باری تعالیٰ ہے:
﴿یٰٓاَیُّهَا النَّاسُ اَنْتُمُ الْفُقَرآئُ اِلَی اللّٰهِ﴾ (فاطر:۱۵)
”اے لوگو! تم سب اللہ تعالیٰ کے محتاج ہو۔“
٭ بنیادی ضرورت کا فقدان، ارشاد باری تعالیٰ ہے:
﴿لِلْفُقَرَآءِ الَّذِیْنَ اُحْصِرُوْا في سَبِیْلِ اللّٰهِ﴾ (البقرہ:۲۷۳)
”زکوٰۃ و صدقات ان فقراء اور ضرورت مندوں کے لیے ہیں جو اللہ کی راہ میں روک لیے گئے۔“
٭ عدم قناعت، یہ نفس کے غنا اور بے نیازی کے مقابلے میں استعمال ہوتا ہے کیونکہ بسا اوقات انسان مال و دولت کی کثرت کے باوجود فقیر ہوتا ہے۔ کیونکہ اس میں قناعت نہیں ہوتی۔
٭ اللہ تعالیٰ کی طرف فقیر ہونا، جیسے فرمایا:لا تفقرنی بالاستغناء عنك ”مجھے اپنے سے بے نیاز کرکے فقیر نہ بنانا۔ (فضل الله الصمد)
مذکورہ دعا میں تیسری صورت سے پناہ مانگی گئی ہے کہ انسان کے اندر حرص اور لالچ پیدا ہو جائے اور قناعت سے محروم ہو جائے۔ اسی دوسری صورت بھی مراد ہے جبکہ صبر اور اللہ کی رضا نہ ہو۔
(۲) قلت سے مرادنیکی اور خیر کے کاموں میں قلت ہے کیونکہ دنیا میں کثرت ممدوح نہیں ہے، بعض نے اس سے مال، دوستوں، اور صبر کی قلت مراد لی ہے کہ اس سے پناہ مانگی ہے کہ انسان بنیادی ضرورتوں سے محروم ہو جائے اور اللہ کی عبادت بھی نہ کرسکے۔
(۳) ذلت کا مطلب یہ ہے کہ آدمی کی لوگوں کے سامنے کوئی حیثیت نہ ہو اور وہ حقیر سمجھیں اور اس کو کوئی اہمیت نہ دیں۔ لیکن یہاں زیادہ واضح معنی یہ معلوم ہوتے ہیں کہ معصیت اور نافرمانی کے نتیجے میں حاصل ہونے والی ذلت مراد ہے۔ یا قلت کی بنا پر امراء کے سامنے ذلیل ہونا مراد ہے۔
(۴) آدمی ظالم ہو یا مظلوم ہر دو صورتوں میں اس کے لیے گھاٹا ہے۔ ظالم ہو تو اللہ تعالیٰ کی ناراضی کا موجب ٹھہرے گا اور مظلوم ہو تو دنیا کی ذلت کے ساتھ ساتھ اللہ تعالیٰ کی ناشکری اور مایوسی کی وجہ سے اس سے دوری کا باعث بن سکتا ہے۔ گزشتہ اوراق میں قہر الرجال کی جن صورتوں سے پناہ کا ذکر ہوا ہے ان میں سے ایک یہ بھی ہے۔

فوائد ومسائل:
اس روایت کی سند ضعیف ہے، تاہم آپ صلی اللہ علیہ وسلم نے سیدہ عائشہ رضی اللہ عنہا کو اس سے ملتی جلتی دعا سکھائی تھی جو اسی کتاب میں رقم ۶۳۹ پر گزر چکی ہے۔