فوائد ومسائل:
مطلب یہ ہے کہ جس مرد یا عورت کے تین بچے بچپن ہی میں فوت ہوگئے اور اس نے اللہ تعالیٰ سے ثواب کی امید رکھتے ہوئے صبر کا مظاہرہ کیا، جیسا کہ دوسری احادیث میں ہے تو اللہ تعالیٰ اسے جہنم میں داخل نہیں کرے گا۔ البتہ جہنم پر جو پل صراط ہے اس پر سے گزرنا پڑے گا اور اسے ”قسم پورا کرنے کے لیے“ سے تعبیر کیا گیا ہے۔ ارشاد باری تعالیٰ ہے:
﴿وَ اِنْ مِّنْکُمْ اِلَّا وَارِدُهَا﴾ (مریم:۷۱)
”تم میں سے ہر ایک کو ضرور جہنم پر وارد ہونا ہے۔“
حافظ ابن حجر نے قسم کے حوالہ سے کئی توجیہات ذکر کی ہیں:
(۱)....”ان منکم....الخ“ سے پہلے قسم محذوف ہے۔
(۲)....پہلے قسم کا ذکر ہوا ہے:”فوربک لنحشرنہم....الخ“ اس قسم کے جواب پر آیت کا عطف ہے۔
(۳)....زیر نظر اایت کے آخر میں ہے ”حتمًا مقضیًا“ یہ الفاظ قسم کا مفہوم دے رہے ہیں۔ (فتح الباري:۳؍ ۱۲۴)

فوائد ومسائل:
(۱)صحیح مسلم میں ہے کہ اس عورت کا بچہ بیمار تھا۔ اسے ڈر لاحق ہوا کہ مبادا یہ بھی فوت ہوجائے (صحیح مسلم، البر والصلة، حدیث:۲۶۳۶)اس نے آپ سے دعا کی درخواست کی جس سے معلوم ہوا کہ کسی سے دعا کروانی جائز ہے اور اس کے لیے اپنی مصیبت کا ذکر کرنا بھی ناشکری کے ضمن میں نہیں آتا۔
(۲) بلوغت سے قبل فوت ہونے والے بچے ماں باپ کو جنت میں لے جانے کا باعث بنیں گے اور جہنم سے رکاوٹ بن جائیں گے بشرطیکہ انہوں نے صبر کیا ہو اور موحد ہوں۔ احتظار کا مطلب یہ ہے کہ انہوں نے اپنے اور جہنم کے درمیان ایک مضبوط باڑ کھڑی کرلی ہے اور جہنم میں نہیں جائیں گے جس کا لازمی نتیجہ یہ ہوگا کہ وہ جنت میں جائیں گے۔