فوائد ومسائل:
(۱)اس حدیث میں ہمسایوں کی دو اقسام ذکر کی گئی ہیں:محلے وغیرہ میں مستقل ہمسایہ، جنگل یا سفر کا ہمسایہ، جنگل یا سفر کا ہمسایہ بھی اگر برا ہو تو انسان کا سفر کٹھن ہو جاتا ہے۔ اس سے انسان اس طرح چھٹکارا پاسکتا ہے کہ کسی اور جگہ اپنا خیمہ لگالے اور یہ بھی ممکن ہے کہ وہ خود دوسری جگہ منتقل ہو جائے لیکن جہاں انسان مستقل رہائش پذیر ہے، لاکھوں روپے لگا کر مکان بنایا ہے نواب وہاں سے انسان کے لیے رہائش تبدیل کرنا خاصا مشکل ہوتا ہے بلکہ بسا اوقات محال ہوتا ہے اس لیے مستقل قیام گاہ کے برے ہمسائے سے پناہ طلب کی گئی ہے۔
(۲) اس حدیث سے معلوم ہوا کہ کوشش کرکے اچھا ہمسایہ تلاش کرنا چاہیے اور برے پڑوس سے بچنا چاہیے تاہم اگر انسان کسی آزمائش میں پھنس جائے تو اسے چاہیے کہ امر بالمعروف اور نہی عن المنکر کا فریضہ انجام دیتا رہے۔ اس طرح وہ اس کے افعال سے بری الذمہ ہو جائے گا اور قیامت کے روز بھی اس کی ہمسائیگی سے محفوظ رہے گا۔
(۳) اگر ”دارالمقام“ سے آخرت مراد لی جائے تو پھر اس کا مفہوم یہ ہوگا کہ قیامت کے روز برے لوگوں کا پڑوس نہ دینا کیونکہ وہ یقینا جہنم ہوگا۔
(۴) اللہ تعالیٰ سے دعا و التجا مومن کا ہتھیار ہے۔ انسان کتنا صاحب بصیرت ہو فیصلہ کرنے میں غلطی کرسکتا ہے۔ ممکن ہے وہ کسی کو اچھا سمجھ کر اس کا پڑوس اختیار کرلے لیکن اس کا اندازہ غلط ہو، کسی کو اچھا سمجھ کر اس کے ساتھ شراکت کرلے لیکن وہ دھوکے باز ہو اس لیے اللہ تعالیٰ سے التجا ضرور کرتے رہنا چاہیے۔

فوائد ومسائل:
(۱)اس حدیث میں برے ہمسائے کو قیامت کی نشانی بتایا گیا ہے کہ قیامت کے قریب ایسے حالات پیدا ہو جائیں گے کہ لوگ حق ہمسائیگی کو فراموش کر دیں گے، یہاں تک ہمسایہ جو دوسرے ہمسائے کا محافظ ہوتا ہے خود اپنے ہمسائے کو قتل کرے گا۔
(۲) اس حدیث میں ہمسائے کی فضیلت اور اس کے عظیم حق کو اس طرح بیان فرمایا کہ پہلے ہمسائے کا تذکرہ کیا اور اس کے بعد بھائی اور باپ کا تذکرہ کیا۔ گویا ہمسائے کی حرمت بھائی اور باپ کی طرح ہیں۔
(۳) ”ہمسائے، بھائی اور باپ“ کی ترتیب سے یہ بھی معلوم ہوتا ہے کہ پہلے لوگ ہمسایوں کے بارے میں اس قدر بے باک ہو جائیں گے کہ انہیں قتل کریں گے، پھر یہ بے حسی اس قدر بڑھے گی کہ بھائی جیسے عزیز رشتے کا بھی لحاظ ختم ہو جائے گا اور بالآخر نوبت یہاں تک آجائے گی کہ لوگ دنیا یا کسی اور مفاد کے لیے ماں باپ کو بھی قتل کرنے سے دریغ نہیں کریں گے۔
(۴) قیامت سب سے برے لوگوں پر قائم ہوگی۔ نیکی ختم ہو جائے گی اور اللہ کا نام لینے والا کوئی نہیں رہے گا تو قیامت کبریٰ برپا ہوگی، تاہم اس کے قریب ہونے کی دیگر نشانیوں میں سے یہ بھی ہے کہ اللہ کی معصیت اعلانیہ ہوگی، فساد، پھیل جائے گا، قتل و غارت عام ہو جائے گا اور اللہ کی حرمتوں کو بے دریغ پامال کیا جائے گا۔ دور حاضر میں یہ حالات واقعی پیدا ہوچکے ہیں۔ آئے روز اخبارات ایسی خبروں سے بھرے پڑے ہیں کہ بھائی نے بھائی کو قتل کر دیا، باپ کو مار ڈالا، پڑوسیوں کے پورے خاندان کو قتل کر دیا۔ (أعاذنا اللّٰه منه)